ஹைதராபாத்: தற்போதைய காலகட்டத்தில் அதிகரித்து வரும் வட்டி விகிதங்களைக் கருத்தில் கொண்டு, முதலீட்டாளர்கள் தங்கள் தேர்வுகளைச்செய்வதில் மிகுந்த எச்சரிக்கையுடன் இருக்க வேண்டும். குறிப்பாக, ஓராண்டு முதல் ஐந்து ஆண்டுகள் வரையிலான 'குறுகிய கால முதலீடுகளின்' பக்கம் செல்லும்போது, சரியான திட்டங்களை கவனமாக தேர்ந்தெடுக்க வேண்டும். அப்போதுதான், அவர்களின் கடினச் சம்பாத்தியத்திற்கு எந்த நஷ்டமும் ஏற்படாமல் உத்தரவாத வருமானத்தைப் பெறுவதற்கான வாய்ப்பு இருக்கும்.
முதலீட்டுத் திட்டங்களைத் தேர்ந்தெடுப்பதற்கு முன், ஒவ்வொரு வருங்கால முதலீட்டாளரும் அவர்களின் ஒட்டுமொத்த தேவைகளைக் கருத்தில் கொண்டு நிதி இலக்குகளை நிர்ணயிக்க வேண்டும். நீண்ட காலத் திட்டங்கள் நல்ல பலனைத் தரும், அதேசமயம், குறுகிய கால முதலீடுகள் தேவை என நினைக்கும் போதெல்லாம் பணத்தை பெறும் வசதி உடையதாக உள்ளது. எனவே, பாதுகாப்பான குறுகிய கால முதலீடுகளை மட்டும் தேர்ந்தெடுப்பது மிகவும் முக்கியம்.
தற்செயல் நிதியாக திறம்பட செயல்படுவதால் 'திரவ நிதிகள்' (Liquid Funds) குறுகிய கால முதலீடாக தேர்ந்தெடுக்கப்படலாம். வங்கிக் கணக்குகளில் சேமிப்பு வைப்புத்தொகையுடன் ஒப்பிடும்போது அவை சற்று சிறந்த வருமானத்தை அளிக்கின்றன. திரவ நிதிகள் பாதுகாப்பான முதலீடுகளாகக் கருதப்படுகின்றன. அவற்றை முதலீட்டுத் தேதியிலிருந்து எப்போது வேண்டுமானாலும் திரும்பப்பெறலாம். இதன் மூலம் வரியைத் தாண்டி நான்கு முதல் ஏழு விழுக்காடு வட்டி வரை பெற இயலும்.
திரவ நிதிகளின் காலம் ஒன்று முதல் 90 நாட்கள் வரை இருக்கும். மிகவும் குறிப்பிடத்தக்க விஷயம் என்னவென்றால், திரவ நிதிகளின் நிகர சொத்து மதிப்பு (NAV) நிலையானதாக உள்ளது மற்றும் அரிதான சூழ்நிலைகளில் மட்டுமே குறைகிறது. முதலீட்டாளர்களுக்கு உகந்த மற்றொரு அம்சம் என்னவென்றால், இந்த முதலீட்டு யூனிட்களை விற்ற இரண்டு முதல் மூன்று நாட்களுக்குள் நமது கணக்குகளில் பணம் டெபாசிட் செய்யப்படும்.
பின்னர், 'அல்ட்ரா ஷார்ட் டூரேஷன் ஃபண்டுகள்' உள்ளன. அதில் மூன்று முதல் ஆறு மாதங்கள் வரையிலான முதலீடுகளை செய்யலாம். இந்த அல்ட்ரா ஷார்ட் ஃபண்டுகள் நிறுவனங்களுக்கு கடன்களை வழங்குகின்றன. இதன் காரணமாக, திரவ நிதிகளுடன் ஒப்பிடும்போது, இந்த அல்ட்ரா ஷார்ட் ஃபண்டுகளில் சிறிய ஆபத்து காரணி உள்ளது. இருப்பினும், அல்ட்ரா ஷார்ட் முதலீடுகள் வங்கிகளில் நிலையான வைப்புத்தொகையுடன் ஒப்பிடும்போது சமமான அல்லது சற்று அதிக வருமானத்தை அளிக்கும்.
ஈக்விட்டிகள் மற்றும் ஃபியூச்சர்களில் முதலீடு செய்வதன் மூலம் சற்றே அதிக வருமானத்தை நோக்கமாகக் கொண்டவர்கள் 'ஆர்பிட்ரேஜ் ஃபண்டுகளை’ தேர்வு செய்யலாம். இதனால் கிட்டத்தட்ட எட்டு முதல் ஒன்பது விழுக்காடு ஆண்டு வருமானம் பெறலாம். ஈக்விட்டி ஃபண்டுகளை நிர்வகிக்கும் அதே விதிகள், இந்த ஃபண்டுகள் மூலம் கிடைக்கும் லாபத்திற்கும் பொருந்தும்.
இதையும் படிங்க: புழக்கத்திற்கு வந்தது ஆர்பிஐயின் டிஜிட்டல் கரன்சி... நன்மையா? தீமையா?
